• Tá Tú Anseo:
• Baile /
• Foilseacháin /
• Tuarascálacha Bhliantúil /
• Tuarascáil Bhliantúil an Ombudsman 2003

Tuarascáil Bhliantúil an Ombudsman 2003

Caibidil 4 - Ráiteas Straitéise 2004-2006 na hOifige

 

Caibidil 4 - An Bhliain faoi Athbhreithniú

Roimhe

......Gníomhaíocht Pleanála Gnó i 2003
......Seirbhís dár gCliaint
......Tuarascáil Dul Chun Cinn ar ár Straitéis Bainistíochta Acmhainní Daonna (BAD)
......Ráiteas Straitéise 2004-2006 na hOifige
......Gníomhaíocht Bainistíochta Eile
......Cúiteamh d'Íocóirí Cánach - Moltaí a Chur Chun Feidhme
......Feidhmíocht Údaráis Áitiúil ar Phleanáil
......Sainchúram an Ombudsman
......Comhlachtaí Poiblí agus Rochtain ar Fhaisnéis
......An tOmbudsman agus Pribhléid Ghairmiúil Dhlíthiúil
......Cúiteamh i leith Caillteanais Cumhachta Ceannaigh do Phinsinéirí i Scéimeanna Aoisliúntais
......Rochtain agus Feasacht Phoiblí
......Cuairteoirí ar m'Oifig
......Fógraí arna n-eisiúint faoi Alt 7 den Acht Ombudsman, 1980

Gníomhaíocht Pleanála Gnó i 2003
Leanadh de ghníomhaíochtaí pleanála gnó le linn 2003 ar fad ag féachaint le cáilíocht na seirbhíse a chuirimid ar fáil dár gcliaint a fheabhsú agus tacú le forbairt phearsanta ár bhfoirne chun an tseirbhís sin a chur ar fáil.

Seirbhís dár gCliaint

Scagadh Cásanna
Rinneadh na nósanna imeachta um scagadh cásanna a tugadh isteach den chéad uair i 2001 a mhionchoigeartú ar roinnt bealaí i 2003 agus tá na nósanna imeachta ionchorpraithe go mór anois. Tugann siad fócas breise don mheasúnacht tosaigh ar ghearáin nua ionas gur léir cé na saincheisteanna is gá a shaothrú leis an gcomhlacht poiblí. Ina theannta sin, cabhraíonn siad chun a shoiléiriú má tá gnéithe den ghearán ann a d'fhéadfadh a bheith lasmuigh den sainchúram. Cumasaíonn na nósanna imeachta do bhainisteoirí freisin treorú mionsonraithe a thabhairt do chásoibrithe ar an gcaoi le tabhairt faoin gcás ón tús.

Cásobair Cháilíochta
Le linn 2003 shampláil roinnt grúpaí oibre den Oifig comhaid ghearáin aonair trí thagairt do shraith caighdeán agus táscairí cáilíochta comhaontaithe agus cuireadh tuarascálacha ar a dtorthaí faoi bhráid an Choiste Chomhairligh Bainistíochta ar bhonn gach dhá mhí. Rinneadh amach tuarascáil achomair a chlúdaigh an bhliain ina hiomláine inar áiríodh moltaí ar an gcaoi le cásobair cháilíochta a chothabháil agus a fheabhsú agus ar an gcaoi leis an bpróiseas samplála a fheabhsú, rud a leanfar de feadh 2004. Tá beartú tosaíochta tugtha do chur chun feidhme na moltaí le haghaidh gníomhaíochta i bPleananna Gnó 2004 na hOifige.

Cásuimhreacha
Rinneadh dul chun cinn maith sa réimse seo i 2003. Socraíodh sprioc de 865 chás idir lámha ag deireadh 2003 agus bhí 814 chás idir lámha ag deireadh na bliana. D'fhéachamar le líon na gcásanna a bhíonn oscailte níos mó ná 52 sheachtain a laghdú go 173 faoi dheireadh 2003 agus is 167 a bhí sa líon cásanna dá leithéid sin ag deireadh na bliana.

Caidreamh le Comhlachtaí Poiblí faoi Shainchúram
Le linn na bliana lean m'Oifig dá clár seimineár réigiúnach, mar a comhaontaíodh idir m'Oifig agus ionadaithe an Chumainn Bainisteoirí Contae agus Cathrach. Is é cuspóir na seimineár ná caidreamh oibre níos fearr a chothú idir m'Oifig agus údaráis áitiúla ionas gur féidir linn tuiscint níos fearr a fháil ar ár róil féin agus bealaí a scrúdú inar féidir linn seirbhís cháilíochta níos fearr a chur ar fáil dár gcliaint féin. Bhuail m'fhoireann le triúr Bainisteoirí Contae anuraidh agus tionóladh dhá sheimineár in dhá shuíomh: Comhairle Contae Chill Mhantáin agus Comhairle Contae Chorcaí. Ag leanúint den téama: Cad is féidir le húdaráis áitiúla a dhéanamh chun seirbhís don Ombudsman a fheabhsú agus conas is féidir leis an Ombudsman cabhrú le húdaráis áitiúla, is spéis leis an Oifig cultúr cabhrachta seachas cáinte (cairéad in áit na cleithe) a chur chun cinn agus aon bhac ar chumarsáid éifeachtach a d'fhéadfadh a bheith ann idir m'Oifig agus údaráis áitiúla a shárú. Táim buíoch de na húdaráis ósta a d'eagraigh na seimineáir agus as an modh cúirtéiseach agus fáilteach inar glacadh le m'fhoireann. Leanfaimid den phróiseas a fhorbairt agus glacfaidh ar bord tuairimí ó údaráis áitiúla d'fhonn a chinntiú go mbíonn deis ag gach údarás áitiúil páirt a ghlacadh i seimineár sa gharthodhchaí.

Tionóladh tionscnaimh oiliúna le Bord Sláinte an Lár-Réigiúin agus leis an Roinn Gnóthaí Sóisialacha agus Teaghlaigh. Rinneadh dul chun cinn mór leis an Roinn Sláinte agus Leanaí, a ghlac le prionsabail an Ombudsman i ndáil le cúiteamh agus a chuaigh i mbun plé réamhghníomhaigh faoi dheacrachtaí i léirmhíniú na dtreoirlínte faoin ndéantar cinntí ar Liúntas Cúraim Baile. Cé nach bhfuil reachtaíocht foilsithe go nuige seo lena gcuirtear nós imeachta maidir le gearáin reachtúla ar bun, sainaithníodh i bhfrámaíocht ar láimhsiú gearán i réigiún an oirthir, arna forbairt ag Údarás Sláinte Réigiúnach an Oirthir, an tOmbudsman mar bhealach oiriúnach deiridh chun gearán a dhéanamh. Ghlac baill foirne ó m'Oifig ról suntasach freisin i dtionscnamh a bhain le táscairí sástachta othair a d'fhorbair Feidhmeannas na mBord Sláinte ag éirí as an straitéis náisiúnta sláinte.

Le linn na bliana chuaigh roinnt Rann, lena n-áirítear an Roinn Oideachais agus Eolaíochta, i gcomhairle le m'Oifig maidir le nósanna imeachta um ghearáin agus achomhairc inmheánacha a fhorbairt.

| Chuig Barr |

Tuarascáil Dul Chun Cinn ar ár Straitéis Bainistíochta Acmhainní Daonna (BAD)
I dTuarascáil Bhliantúil na bliana seo caite leagadh amach an cúlra lenár Straitéis BAD a bhí ag teacht chun cinn agus an réasúnaíocht laistiar di. I ndiaidh comhairliúcháin fhairsing leis an bhfoireann ba mhór agam maoirseacht a dhéanamh ar chríochnú agus ar sheoladh Straitéis BAD 2003-2005 i mí Iúil 2003.

Cé go bhfuil an clár oibre BAD an-leathan is é an cur chuige a glacadh ná raon teoranta saincheisteanna a shainaithint a d'fhéadfaí a fhoirmiú mar thionscadail a bhí le cur chun feidhme go hiomlán thar thrí bliana na straitéise. Bhí na tionscadail sin le cur chun feidhme ag baint úsáide as obair fhoireann-bhunaithe le cúnamh ball foirne tarraingthe ó réimsí uile na hOifige. D'fholaigh an straitéis fhoilsithe Pleananna Gníomhaíochta do na ceithre réimse tosaíochta roghnaithe seo a leanas: Ionduchtúchán, Luachanna Saothair agus Spreagadh, an Córas Bainistíochta agus Forbartha Feidhmíochta (CBFF) (lena n-áirítear monatóireacht ar an bpróiseas, próifílí róil agus inniúlachtaí a chaighdeánú, agus oiliúint agus forbairt a sheachadadh) agus Comhionannas Inscní.

Ionduchtúchán
Ba é an aidhm ná clár oiliúna ionduchtúcháin cuimsitheach foirmiúil a tháirgeadh d'iontrálaithe nua san Oifig. Bunaíodh Grúpa Oibre a d'fhoirmigh Frámaíocht d'Oiliúint Ionduchtúcháin. Ina thuarascáil don bhainistíocht shainaithin an Grúpa raon cuimsitheach modúl oiliúna ionduchtúcháin ar leibhéal cineálach agus rannógach agus rinne moltaí faoin gcaoi inar ceart iad a dhréachtú agus a sheachadadh. Sannadh freagracht ansin do na baill foirne aonair agus thosaigh foirne ag dréachtú ábhar mhodúil na Frámaíochta d'Oiliúint Ionduchtúcháin. Déanann an Coiste Comhpháirtíochta monatóireacht ar dhul chun cinn agus seiceáil ar na modúil aonair de réir mar a tháirgtear iad. Tá sé beartaithe go mbeidh clár iomlán oiliúna ionduchtúcháin comhaontaithe agus i bhfeidhm faoi shamhradh 2004.

Luachanna Saothair agus Spreagadh
Bunaíodh Grúpa Bainistíochta Láir um Luachanna Saothair agus Spreagadh i 2003. Is é an sainchúram atá aige ná scrúdú a dhéanamh ar bhealaí leis an bhfoireann a spreagadh agus conas inspreagadh agus tiomantas a chothabháil d'fhonn polasaithe a fhorbairt agus a chur chun feidhme maidir leis sin i 2004. Mar chuid den chlár oibre d'eisigh an Grúpa ceistneoir chuig gach ball foirne ag féachaint lena dtuairimí faoi shaincheisteanna atá bainteach le hobair a fháil a d'fhéadfaí a fheiceáil mar inspreagthach nó díspreagthach. Fiafraíodh díobh freisin ar mheas siad go raibh na scéimeanna agus na teidlíochtaí ina luachanna saothair e.g. incrimintí srl. Gné spéisiúil de na torthaí is ea gurb é an fachtóir inspreagthach is airde a shainaithin an fhoireann ná cineál na hoibre a bhí siad a dhéanamh laistigh den eagraíocht. Ag baint úsáide as torthaí an tsuirbhé beidh an Grúpa ag rith sraith cruinnithe le pearsana aonair agus grúpaí foirne chun tuiscint níos doimhne a fháil ar an rud a spreagann iad agus bainfear úsáid as sin sa phróiseas foirmithe polasaí ansin.

CBFF
Tá an Córas Bainistíochta agus Forbartha Feidhmíochta (CBFF) ina bhunchuid anois den chaoi ina bhfeidhmíonn an Oifig. D'fholaigh mórfhorbairtí i 2003 suirbhé atmaisféir eagraíochtúil a dhéanamh mar ullmhúchán don chéad chéim eile de CBFF lena spreagfar sealbhóirí poist, le linn a n-athbhreithnithe feidhmíochta bhliantúil, le haiseolas aníos a thabhairt ar fheidhmíocht a maoirseora. Bhí torthaí an tsuirbhé atmaisféir an-dearfach. Thaispeáin sé gur aontaigh 90% den fhoireann go raibh siad soiléir maidir lena róil laistigh den eagraíocht ina hiomláine; tá an tsoiléireacht sin go mór i ngeall ar oibriú an CBFF. Ar an dul céanna, d'aontaigh 83% gur chuir an bhainistíocht treorú, pleananna agus dul chun cinn in iúl don fhoireann.

Ullmhaíodh sraith iomlán inniúlachtaí le haghaidh gach gráid san eagraíocht i 2003 agus bhain baill foirne agus bainisteoirí úsáid aisti chun riachtanais a chinneadh le haghaidh feidhmíochta éifeachtaí agus le haghaidh oiliúna agus forbartha éifeachtaí.

Comhionannas Inscní
Déanann Grúpa Comhionannais Inscní monatóireacht ar spriocanna cothromaíochta inscní na hOifige agus ar na fachtóirí a d'fhéadfadh dul i gcion ar ghnóthachtáil na spriocanna sin mar:

� páirtíocht foirne i gcomórtais ardaithe céime;

� tionscnaimh oiliúna agus fhorbartha;

� comhdhéanamh inscne na mbord agallaimh le haghaidh comórtas inmheánach/idir-rannach;

� glacadh le tionscnaimh theaghlach-chairdiúil (fleisc-am, postroinnt, am téarma, sosanna gairme);

� an dáileadh fear agus ban ar fud rannóga na hOifige.

Tuairiscíonn sé ar na saincheisteanna seo don Choiste Comhairleach Bainistíochta ar bhonn ráithiúil. Déanann an Grúpa promhadh inscne ar pholasaí iomchuí nua na hOifige agus le linn 2003 d'fhorbair sé treoirlínte maidir le comhionannas inscní le haghaidh agallóirí agus measúnóirí.

Tá feidhm ag spriocanna inscne na hOifige le gráid ar leibhéal Oifigeach Feidhmiúcháin agus os a chionn sin in Oifig an Ombudsman, Oifig an Choimisinéara Faisnéise agus Oifig Rúnaíocht an Choimisiúin um Chaighdeáin in Oifigí Poiblí. Is é cúig bliana an fráma ama chun na spriocanna a bhaint amach. Faoi láthair tá an céatadán ban i ngráid Oifigigh Feidhmiúcháin, Ard-Oifigigh Feidhmiúcháin agus Phríomh-Oifigh Chúnta (Imscrúdaitheoir) beagán faoi bhun nó os cionn na spriocanna comhaontaithe. Táthar ag súil go mbainfear an ráta spriocpháirtíochta ar leibhéal Príomh-Oifigigh (Imscrúdaitheoir Sinsearach) amach laistigh den fhráma ama le cúnamh gníomhach polasaithe comhionannais inscní.

| Chuig Barr |

Ráiteas Straitéise 2004-2006 na hOifige
Le cúnamh éascaitheoirí seachtracha dhréachtaigh an tOmbudsman/Coimisnéir Faisnéise agus an Bhainistíocht Shinsearach moltaí le haghaidh Ráiteas Straitéise a chlúdaíonn an tréimhse 2004-2006. Cuimsíonn an Straitéis Oifig an Ombudsman, Oifig an Choimisinéara Faisnéise agus an Rúnaíocht don Choimisiún um Chaighdeáin in Oifigí Poiblí. I ndiaidh próisis comhairliúcháin fhorleathain leis an bhfoireann ar fud na heagraíochta agus leis an gCoiste Comhpháirtíochta tugadh Straitéis chomhaontaithe chun críche inar sainaithníodh na ceithre Sprioc Ardleibhéil atá againn chun obair na heagraíochta a threorú thar na trí bliana romhainn. Is iad sin:

Sprioc Ardleibhéil 1
Tabharfaimid seirbhís ardcháilíochta dár gcliaint, seirbhís atá éifeachtúil, so-inrochtana, agus a tháirgeann cinntí soiléire agus cothroma.

Sprioc Ardleibhéil 2
Oibreoimid leis na comhlachtaí poiblí agus na hinstitiúidí faoinár sainchúram chun tacú leo chun na caighdeáin is airde a bhaint amach agus a chothabháil ina n-idirghníomhaíochtaí le húsáideoirí aonair seirbhíse.

Sprioc Ardleibhéil 3
Tiomnóimid taithí agus údarás na hOifige do shochaí na státseirbhíse agus, ag obair le chéile leis na hinstiúidí agus comhlachtaí poiblí faoinár sainchúram, féachfaimid lena chinntiú go bhfóntar go cuí do leas an phobail.

Sprioc Ardleibhéil 4
Forbróimid mar eagraíocht barrchleachtais ag oibriú na gcaighdeán is airde i seachadadh ár seirbhísí.

Ag sreabhadh ó na Spriocanna Ardleibhéil tá raon gníomhaíochtaí tacaíochta sainaitheanta, gníomhaíochtaí a chuirfidh leis an mbabhta nua pleananna gnó bliantúla do na trí chomh-Oifig thar thréimhse na Straitéise. Déanfar cuspóirí a sheachadadh trí mheán gníomhaíochtaí ar leibhéal Corparáideach, ar leibhéal Aonaid Gnó agus trí spriocanna agus trí ghníomhaíochtaí comhaontaithe idir bainisteoirí agus gach ball foirne a bheidh leagtha amach i spriocanna agus i gcuspóirí bainistíochta feidhmíochta aonair.

Back to contents