• Tá Tú Anseo:
• Baile /
• Foilseacháin /
• Tuarascálacha Bhliantúil /
• Tuarascáil Bhliantúil an Ombudsman 2003

Tuarascáil Bhliantúil an Ombudsman 2003

Caibidil 4 - Sainchúram an Ombudsman

Sainchúram an Ombudsman
Tá roinnt píosaí nua reachtaíochta ann a rachaidh i gcion ar ualach oibre agus ar shainchúram m'Oifige. Is mór agam a thabhairt faoi deara go bhfuil tiomantas tugtha ag an rialtas i leith an Bille Ombudsman (Leasú) a fhoilsiú go déanach i 2004 agus tá súil agam go ndéanfar é a achtú go pras. I measc nithe eile déanfar sa Bhille seo socrú i dtaobh fairsingiú mór ar an raon comhlachtaí poiblí a thiocfaidh faoi mo shainchúram.

Forchuireann Acht na dTeangacha Oifigiúla, 2003, oibleagáidí reachtúla nua ar líon mór comhlachtaí poiblí maidir le caighdeán níos airde seirbhíse a chur ar fáil trí Ghaeilge. Cé go bhfuil Coimisinéir, Séan Ó Cuirreáin ceaptha le monatóireacht a dhéanamh ar chomhlíonadh an Achta agus le himscrúdú a dhéanamh ar ghearáin faoi theip chun oibleagáidí faoin Acht a chomhlíonadh beidh an cumhacht agam i gcónaí imscrúdú a dhéanamh ar ghearáin a bhaineann le gníomhartha riaracháin na gcomhlachtaí poiblí faoi mo shainchúram i ndáil le cúrsaí Gaeilge. Táim ag súil le méadú ar an líon gearán sa réimse seo ag éirí as an Acht nua.

Tugann an Bille Míchumais beartaithe ról don Ombudsman chun scrúdú a dhéanamh ar ghearáin i ndáil le neamhchomhlíonadh pleananna earnálacha atá le dréachtú chun a thaispeáint conas a chomhlíonfaidh comhlachtaí poiblí a gcuid oibleagáidí maidir le seirbhísí a chur ar fáil do dhaoine faoi mhíchumas. Tá an dóchúlacht ann go mbeidh tionchar mór aige seo ar ualach oibre m'Oifige agus, sa mhéid go mbaineann sé le mo ról faoin mBille Míchumais, fairsingeoidh sé go mór an líon comhlachtaí a bheidh faoi mo shainchúram.

Leis an Acht um Ombudsman do Leanaí leasaíodh Alt 5 den Acht Ombudsman, 1980, chun scrúdú ar ghearán ag an Ombudsman a eisiamh i gcás go bhfuil an gnó cuí don Ombudsman do Leanaí. Folóidh feidhmeanna an Ombudsman do Leanaí imscrúdú ar ghearáin i gcás go bhfuil tionchar díobhálach imeartha ar leanbh ag gníomh a d'fhéadfadh a thuairisciú mar mhíriaradh. Beidh m'Oifig ag déanamh idirchaidrimh leis an Ombudsman do Leanaí, Ms Emily Logan, chun déileáil le haon saincheisteanna dlínse a d'fhéadfadh teacht chun solais mar thoradh ar an reachtaíocht.

Back to contents