• Tá Tú Anseo:
• Baile /
• Foilseacháin /
• Tuarascálacha Bhliantúil /
• Tuarascáil Bhliantúil an Ombudsman 2003

Tuarascáil Bhliantúil an Ombudsman 2003

Caibidil 4 - Comhlachtaí Poiblí agus Rochtain ar Fhaisnéis

Comhlachtaí Poiblí agus Rochtain ar Fhaisnéis
Le linn an scrúdaithe ar chás forfheidhmithe pleanála in aghaidh Chomhairle Contae Lú, atá ar siúl i gcónaí, thiomsaigh an Chomhairle tuarascáil ar a cuid imscrúduithe ar líomhaintí i leith truaillithe comhshaoil agus diúscartha dramhaíola mídhleathaí. Nuair a lorg an gearánaí cóip den tuarascáil scríobh an Chomhairle chuici agus chuir in iúl di go mbeadh uirthi iarraidh Saorála Faisnéise a chur isteach. Ní fhaca mé aon chúis bhailí nach bhféadfaí an doiciméad a thabhairt don ghearánaí lasmuigh de raon an Achta um Shaoráil Faisnéise, 1997, agus ní raibh aon fhianaise ann a thabharfadh le fios go raibh breithniú déanta ag an gComhairle ar an rogha sin. Nuair a chuir m'fhoireann mo chúis imní in iúl don Chomhairle scaoileadh an doiciméad, saor in aisce, don ghearánaí.

Tuigim freisin, ó fhreagra a thug an tAire Dlí agus Cirt, Comhionannais agus Athchóirithe Dlí sa Dáil i mí na Samhna 2003 go raibh polasaí ag a Roinn gan cúiseanna le diúltú deimhnithe éadóirseachta do phearsa aonair a nochtadh. Cuireadh in iúl d'iarratasóirí neamhrathúla cur isteach ar rochtain ar a dtaifid trí mheán iarrata Saorála Faisnéise. Thug freagra an Aire le fios go raibh éirithe as an bpolasaí sin agus go dtugtar cúiseanna le diúltuithe de ghnáth anois.

Mar Ombudsman creidim go bhfuil sé thar a bheith tábhachtach gur ceart go ndéileálfadh comhlachtaí poiblí go hoscailte le daoine trí fhaisnéis atá ar fáil dóibh a nochtadh don phobal leis an íosmhéid sriantachtaí agus ar bhealach pras, mura bhfuil foras reachtúil bailí nó forais eile ann chun an fhaisnéis a shrianadh nó a dhiúltú. Bheinn an-bhuartha dá dtiocfadh patrún chun cinn nach raibh comhlachtaí poiblí chomh hoscailte trína iarraidh ar dhaoine den phobal úsáid a bhaint as iarrataí Saorála Faisnéise chun faisnéis a fháil is ceart a bheith ar fáil gan dul i muinín an Achta um Shaoráil Faisnéise. Gabhann tábhacht níos mó leis seo sa mhéid gur cumasaíodh faoin Acht um Shaoráil Faisnéise (Leasú), 2003, táillí a thabhairt isteach le haghaidh faisnéise neamhphearsanta arna hiarraidh faoin Acht.

Beidh mé ag faire amach go mór chun a chinntiú go dtugtar don phobal rochtain iomlán agus phras ar fhaisnéis dá bhfuil siad i dteideal sa ghnáthshlí gan iallach a chur orthu dul i muinín ghnáis an Achta um Shaoráil Faisnéise. Déanfaidh mé aon bheart riachtanach in aghaidh comhlachtaí poiblí faoi mo shainchúram nach n-urramaíonn an teidlíocht sin. Tuairisceoidh mé freisin ar aon chásanna comhchosúla a dtagaim orthu i dtuarascálacha bliantúla amach anseo.

Back to contents